السليقة الصفتلية ... متل ما وعدناكن..

[align=center]من احلى الليالي بالصيفية الصفتلية
كانت ليلة السليقة
لانها كانت تصير بالسهرة
وبسهرة السليقة يجتمعو الصبايا والشباب وخلال نضج السليقة
بتدور سهرات الضحك والهرج والمرج والمتة والبزر والحكايات
غير شوي البطاطا بالجمر ودووووووووووق ما اطيب البطاطا المشوية
والعرانيس كمان ... درة مشوية مين على بالو ...
وكمان كانوا يتفقوا على خطط ايام العطلة ولوين بدون يروحوا
بالاضافة لانو باخر السليقة بيكونوا مجهزين المشاوي والعرق والقهوة ع الفحم واكبر جبسة بالبلد
ولعيون التعّيبة كان كل هالشي


اما عملية السليقة ف كانت تتم على هالشكل

غسان حكالنا عن القمح وتنقايتو
ونحنا رح نكمل

بيجيبو حطب قرامي بيجمعون قبل بيوم وبيعلقوا النار بعد ما بيكونوا عمرو محل الجعايل
والجعايل هيي انصاف براميل كانت بالزمان
بس بعدين صاروا يصنعوها خصوصي للسليقة
بعدين يحطو الجعايل على الحجران او بيوت النار المعمرة وبيحطو فيها ماء للنص تقريبا
وبعدين بيكيلو تنكتين ونص قمح وبيحطوون بكل جعيلة



وجرت العادة انو تكون الجعايل مزدوجة
بينما ما جهزت اول وحدة وتم نقلها
بتكون جهزت التانية
وفي ناس كانو يحبو يغطوها
والعادة كانت بلا ما تتغطى السليقة



وبيصيرو يزيدو قرامي الحطب
وينتبهو للنار وما يخلوها تنطفي




كل شوي كانو يشيلو يدوقو السليقة حتى يتاكدو انها نضجت

على جنب بيكونو مجهزين القفف
والقفة عادة بتكون مصنوعة من العيدان المجدولة جدل
بيحطو 3 احجار مقابيل بعض حتى يشكلو مثلثل وبيركزوا القفة عليها حتى تكون عالية عن الارض



وبيصيرو يشيلو القمح المسلوق الناضج بتقلاية او وعاء
يكون كبير والو ايد طويلة منشان ما يضل قمح مسلوق بالجعيلة
ولانو المي بتكون عم تغلي ....منشان ما يحترقو
بيشيلوه وبيحطوه بالقفة العالية عن الارض على حجران



وبيتركوها شوي حتى تصفي المي منها
وبعدين بيحملو تنين القفة او وحد بيحطها على كتفو وبيطلعوها على السطح



عادة قبل بيوم بيجتمعو الصبايا وبيشطفو السطح منيح منشا يحطو السليقة عليه اما هلق صاروا يحطوها على القماش
مع انو على الارض احسن وبينشف بسرعة كبيرة لما تكون الشمس قوية منيح
منشان هيك بيبلشوا السليقة من تموز حتى اب
وبيصيرو على كم مرة بالنهار بيحركوا السليقة خطوط خطوط
وكانو يحركوها بالرجلين المغسولين كتير منيح



بعد عدة ايام بيكونو نشفو منيح
بيرجعو بيحطو الطبلية
والطبلية هيي طاولة مو عالية كتير عن الارض مدورة وبينقوا عليها القمح
وبيرجعو ينقو السليقة من اول وجديد
حتى ما يضل فيها شي ياثر على الطاحونة






لون بتكون خلصت عملية السليقة
والى اللقاء مع

جرش البرغل[/align]


[align=center]الصور بكاميرا DADO [/align]

الله يعطيكي العافية يا Enana موضوع السليقة الكامل المتكامل
ما في احلى من الجمعة بس يكونوا عم يسلقوا و التسلاية مع انو في تعب بس شوي
و بالنهاية الكل بيكونوا مبسوطين
موضوع كتير حلو عن السليقة الصفتلية
بس ما عزمتونا كنا اكلنا سليقة و بتعباتنا

اه ريحت الحاره يا بنت الحاره وصلت لعندي عالبيت الله يسلم

هالديات ويحميكي الله من كل ضرر العز للرز وبالبرغل شنق حاله

انت العز والبرغل على حاله ، دخليك هالسليقه عند مين في الحاره

ام في مكان اخر بس بعتقد انو هالشغل في بيتك انشالله عامر يا رب

ويمكن ايدك الماسكه التقلايه وبشكرك كمان على ذكري اني حكيت عن السليقه

سلمت ياداكي انت والذي صور ويالشتغل من البدايه حتى النهايه حفظكم الله

والله معكون حق يا جماعة

ما في احلى من السليقة
وذكرني علي بشغلة

انو كنا كل ولاد الحارة نجيب صحون او يوزعو ع البيوت
ونحط فيها سليقة ومي وسكر
وناكل
وننطر السليقة لما تصير حتى نحمل صحوننا ونروح تاناكل سليقة بسكر
ما كان اطيب منها

يا غسان
هالسليقة مو عندي بالبيت والله

ولا بالحارة عنا

هيدي دادو صورها من عند ناس اصحابون بس صوب الشرق مو بعيد عنا
يعني ريحة الحارة فيها

يالله رجعتوني شي كم سنة لورا وقت الي كنا نسلق هالحكي من زمان وأنا كنت صغيرة بس بتذكر شوي من شوي عرانيس و صوت الماما وقت الي كون بدي قرب من النار أو احمل الأفة وتقلي بعدي هلق بتحترقي انتي اساتك صغيرة
والمشكلة انو بس كبرت بطلوا يسلقوا طيب شو ذنبي أنا

و الله مافي احلى من وقت السليقة

و بتلاقي الناس بتجتمع بهالايام مع بعضها و تساعد بعضها

شكرا الك انانا على الموضوع الحلو

والله يا الوس
كانت ايام كتير حلوة
وما بظن بقى ترجع
بس بتضل ذكريات

يا عمي شو هالانانا وهالدادو . السنة لم نستطع الذهاب الى صافيتا ولكن مافي مشكلة كانو السليقة اجت لعنا على ابو ظبي
شكرا يا جماعة على هالتراثيات الرائعة . بس على شي صحن مع شوية سكر بتسوى الدنيا ومافيها

احلى ايام , ايام السليقة, وخاصة بالسهرة..

الكل بيساعد الكل وعلى مشاوي وشرب كاس, وسهر لطلوع الضو..

تسلم ايديكون انانا ودادو..